Il dumber d’infecziuns novas cun il coronavirus sa reducescha, tant en Svizra sco er en il Grischun. Il chantun ha registrà dapi l’entschatta favrer en media damain che 50 cas per di. La dumengia èn quai stadas sulettamain 13 infecziuns. Malgrà quest svilup fa la media chantunala, Marina Jamnicki, quitads pervi da las mutaziuns dal virus.
Mutaziuns betg da franar cun las mesiras existentas
Er sch'il dumber da novas infecziuns en general sa sbassia, sa derasian las novas variantas tuttina adina dapli. Las mesiras actualas na parian uschia betg da tanscher per franar las novas variantas dal virus. Perquai è Marina Jamnicki da l’avis che schluccadas pudessan esser privlusas e contribuir ad ina ferma terz’unda.
Tenor la media chantunala valia uss d’avair pazienza e spetgar giu la proxim’emna per guardar co ir vinavant. Far tests en general ed en cas da cumulaziuns sco er vaccinar saja vinavant la via per insacura cuntanscher normalitad.
