Siglir tar il cuntegn

Header

cuntegn

Martgà da lavur Bunamain 800 dischoccupads damain

Il fanadur ha il chantun Grischun dumbrà 1'619 persunas senza lavur, quai èn 769 pli pauc ch'il zercladur (2'388). Uschia ha il Grischun il fanadur ina quota da dischoccupaziun da 1,5%. Il fanadur 2019 aveva il chantun 791 persunas dischoccupadas.

Da las 1'619 persunas dischoccupadas èn 712 dunnas e 907 umens. Ils pli auts dumbers da dischoccupaziun derivan da las spartas gastronomia (407), dal commerzi en detagl (127), da la sparta da sanadad e socialesser (124) sco era dal traffic e transport (105).

Lavur curta

Il fanadur han 1'373 manaschis pajà indemnisaziuns da lavur curta. Quest dumber n'inditgeschia dentant betg il dumber exact dals manaschis che hajan effectivamain lavur curta, scriva l'Uffizi per industria, mastergn e lavur. Il motiv: Davent il cumenzament da la perioda da la calculaziun quintaziun hajan ils manaschis trais mais temp da far valair lur pretensiun sin l'indemnisaziun da lavur curta.

Er en Svizra damain dischoccupads

L'entira Svizra ha dumbrà il fanadur 148'870 persunas senza lavur, il zercladur era quai anc 150'289. La Svizra ha uschia ina quota da dischoccupaziun da 3,2%. Tenor Boris Zürcher dal Seco na saja quest'atun betg da quintar cun in'unda da relaschadas. El quinta che la quota da dischoccupaziun s'augmentia levamain en las spartas construcziun, turissem e gastronomia. Betg cler restia sche persunas pertutgadas da lavur curta perdian anc lur plazza. Il matg eran en l'entira Svizra 890'000 persunas pertutgadas da lavur curta, durant il mais dal lockdown (avrigl) era quai anc passa in milliun.

RTR novitads 07:30

Artitgels legids il pli savens

Scrollar a sanestra Scrollar a dretga