Martin Vincenz è il nov directur da Grischun Vacanzas. Il Sursilvan da 53 onns è il mument anc pledader da medias da l'Ospital chantunal dal Grischun e surprenda ses nov post l’emprim da settember. Las sfidas èn grondas per il nov CEO. El sa però gia ussa, tge ch’è l’impurtant per el: Cunzunt la collavuraziun cun las destinaziuns e cun ulteriurs purtaders da prestaziun.
I va mo ensemen. Ina da mias finamiras è da pudair collavurar fitg stretg oravanttut cun las destinaziuns, ils hotels, las pendicularas... simplamain tut quels che fan il turissem e che fan ils products.
Dapi l'avust passà nagin CEO
L’avust passà, cura che Gaudenz Thoma era partì sco CEO aveva Grischun Vacanzas occupà il post ad interim. Ussa èsi grategià da chattar cun il Sursilvan in nov directur. Martin Vincenz ha gia lavurà en il turissem, tranter auter è el stà directur dad Arosa Turissem.
Tema è il fallì pled, ma respect è adina qua, cura ch'ins ha ina sfida. Respect è insatge bun; lura èn ins pli attents.
Avant 20 onns…
…era Martin Vincenz vegnì tschernì sco directur dad Arosa Turissem. Uschia tunava el da lezzas uras:
