Dapi gievgia passada datti reglas pli severas davart las mascras igienicas. Ellas ston vegnir purtadas en il traffic public ed a las staziuns e fermadas, dadens locals publics, en scolas ed en lieus publics cun blera glieud. Sche questas reglas vegnan resguardadas, ha RTR observà oz a Cuira en zonas da peduns, en butias, en ustarias ed a la saziun.
Mascrina è arrivada en il mintgadi
Ins po observar che la mascra vegn purtada en spezial dadens quasi dapertut. Cun paucas excepziuns vesan ins er che la glieud dovra las mascrinas a moda correcta – sur il nas, la bucca ed il mintun. Dadora n'è la glieud anc betg uschè consequenta cun duvrar il med d'agid igienic, ma er qua vesan ins el en blers lieus.
Il pli savens èsi glieud pli attempada che porta la mascra er dadora. Ma er glieud pli giuvna chamina enturn cun ella. Savens vesan ins dadora che mascrinas vegnan stumpladas giu sut il mintun per mangiar u baiver insatge u per fimar. Ma en general para la mascrina dad esser arrivada en il mintgadi. Las versiuns las pli popularas èn las mascrinas da chirurgia, ma er mascrinas da textil u versiuns pli creativas vesan ins savens.