Il mars 2019 avevan las medias rumantschas signà ina decleraziun communabla da collavurar ed uschia rinforzar la plazza da medias rumantscha sco er da garantir purschidas rumantschas en tun, maletg e text. Per far quai è vegnida fundada la Fundaziun medias rumantschas. Uss èsi cler che Corina Casanova, ch'è stada dal 2008 enfin il 2016 chanceliera federala, daventa presidenta dal cussegl da fundaziun da la FMR.
Ils ulteriurs commembers dal cussegl da fundaziun èn: Aurelio Casanova, Barbara Janom Steiner, Carl Hassler e Rico Valär. Il cussegl è vegnì elegì dal cussegl da fundaziun da l'Agentura da novitads rumantscha (ANR) cun il president Gian Michael. La fundaziun cun sedia a Cuira cumenza sia lavur mez fanadur.
FMR po cumenzar sia lavur
L'incumbensa principala da la Fundaziun medias rumantschas saja da metter a disposiziun texts redigids ed auters cuntegns schurnalistics da buna qualitad en tut ils tschintg idioms e per rumantsch grischun. Cuntegns per rumantsch grischun vegnan er contribuids dad RTR che hajan plitost il caracter da novitads. La redacziun da la FMR vegn manada d'in schefredactur u ina schefredactura – la fasa da recrutaziun saja terminada proximamain, pon ins leger en la communicaziun.
RR novitads 15:00
