Ils responsabels da la Lia Rumantscha han adina puspè suttastritgà ch'il concept ch'è vegnì public avant bun duas emnas saja be in concept intermediar - il project saja anc en la «gravidanza». Forsa n'hai er perquai betg dà grondas discussiuns davart l'idea d'ina fundaziun che duess unir las forzas da las medias rumantschas. Ina u l'autra ensaina da dumonda è dentant tuttina stada avant maun tar delegadas e delegads.
Dubis pertutgant durabilitad dal concept
Dubis hai dà en connex cun il mantegniment da la gasetta La Quotidiana. Flurin Bundi ch'è en suprastanza da la Pro Svizra Rumantscha metta en dumonda sch'il concept ch'è sin maisa è propi er in concept a lunga vista.
Jau tem che nus essan en 4-5 onns puspè al medem punct. Pertge la Somedia po er cun quest concept dir ch'ella na paja betg pli il squitsch e la distribuziun da la Quotidiana.
Er Martin Gabriel ha sincerà ch'ina garanzia per edir la gasetta La Quotidiana dettia er il concept da medias betg. Per quai dovria quai anc adina ina chasa editura che squitscha e distribuescha la gasetta e porta er quels custs.
«Purschida digitala è pauc curaschusa»
Il concept prevesa plinavant ina purschida digitala che vegn concentrada sin la pagina d'internet da RTR. L'idea è che tut ils cuntegns da tut las medias rumantschas vegnan publitgads sin ina pagina d'internet. La finamira saja dad uschia augmentar la schelta sco er la qualitad dals cuntegns, uschia Martin Gabriel. Tenor Flurin Bundi saja quai in bun signal. Er sch'ins haja en egl tecnologias novas, avess el spetgà en chaussas digitalisaziun ch'ins giaja vias pli curaschusas.
Tenor Gabriel sajan bleras dumondas en connex cun la digitalisaziun ed innovaziun anc betg scleridas. Insumma sajan anc diversas dumondas avertas. Fin il pli tard la fin schaner sto tut esser sclerì. Lura ha la gruppa da lavur numnadamain da preschentar il concept a la Confederaziun e lezza decida co vinavant.
RR actualitad 17:00
