Manuel Reichenbach ha survegn sia rassa preferida, ed ils animals creschan si mo in pèr 100 meters sper sia ustaria ed era la mazlaria è en il medem vitg. Strusch vias da transport ed ina stretga collavuraziun cun la pura ed il mazler.
Gia in temp ha el tschertgà in pur ni ina pura che tira la rassa da Salers. Ed ha lura era chattà in en la Svizra centrala. Curt suenter è el ì a spass sper il bain puril da Catrina Livers ora. Il bab da la giuvna pura ha raquintà, ch’els hajan ussa ina nova rassa, quella da Salers. In absolut cas da fortuna per il cuschinier e gerant da la Casa Tödi, che sa chatta mo in pèr 100 meters davent da quest bain puril.
Quai è in grond cas da cletg, che quai è sa dà uschia.
Uschia po il cuschinier visitar ils animals, vesair co quels creschan si ed el po schizunt decider tge animal ch’el vul cumprar.
Il cuschinier da Trun Manuel Reichenbach è gia in temp fascinà da la rassa da Salers. Betg il davos er perquai ch’i dat cumprovas en furma da dissegns en taunas, che la rassa existiva gia avant 7’000 onns. Ils animals sco quai ch'els èn oz eran vegnids tratgs si en il 19avel tschientaner en il vitg da Salers en Frantscha. Per in cuschinier è dentant surtut la qualitad impurtanta. Tenor Manuel Reichenbach è la charn da las vatgas da Salers fitg gustusa e dad auta qualitad.
En Svizra n’è la rassa da Salers anc betg uschè derasada. I dat mo radund 400 vatgas en l’entir pajais. Auter en Frantscha, là dat i passa 200’000 vatgas da Salers. Era en Germania, il Danemarc ed en Engalterra èn las vatgas fitg derasadas. En il chantun Grischun è la rassa enfin ussa anc main enconuschenta. E quai ha era fascinà la giuvna pura Catrina Livers. Da far insatge, che betg tuts fan gia. Ella è dentant, suenter esser s’interessada ditg, era vegnida a savair che la rassa è fitg adattada per la vita en las muntognas.
- caracter fitg ruassaivel
- na dovra nagin pavel concentrà
- modest
- dat bler latg (impurtant per ils vadels)
- fitg robusts
- resistent a chalira e fradaglia
- na dovran nagin agid da parturir ils vadels
- vegnan vegls
Curtas vias tranter bain e mazlaria
In grond avantatg èn era las curtas distanzas. Il hotel da Manuel Reichenbach è sulet in pèr 100 meters davent dal bain puril da Catrina Livers. Era la mazlaria è gnanc in kilometer davent dal bain puril. Igl è la nova mazlaria da Ivo Nay.
Avair la mazlaria uschè datiers saja ina situaziun extraordinaria. Pli datiers na saja strusch pussibel. En il rest da la Svizra ston ils animals savens far in fitg lung viadi enfin la mazlaria.
Tut è datiers in da l’auter. Quai vul dentant dir, ch’ins è era datiers da l'animal ch’ins mazza per pudair mangiar, cuschinar e gudagnar daners. Per il cuschinier Manuel Reichenbach èsi bun ed endretg da vesair ils animals e dad esser conscients, danunder che la charn vegn.
Catrina Livers emprova da betg laschar tiers ina memia gronda relaziun cun ils vadels. Ella sappia che quels vegnian mazzads cura ch’els han strusch in onn. Cun las vatgas haja ella dentant schon ina relaziun pli stretga.
