Sco emprim han ins udì il tun d’alarm general. In tun che va permanent si e giu e dura 1 minuta. Quel è vegnì repetì suenter 5 minutas. Ins haja testà 333 sirenas en l'entir chantun e trais da quellas n'hajan betg funcziunà, scriva l'Uffizi militar e da protecziun civila.
Quella sirena tuna uschia:
Sch'ins avess en il futur d’udir quest tun, duessan ins immediat tschentar en il radio, tadlar ils cumonds ed infurmar ils vischins.
Il segund alarm avessan ins mo udì en las regiuns ch'èn en la vischinanza d'in lai da fermada. I sa tracta da la sirena d’aua. Quai tun sa cumpona da 12 tuns da mintgamai 20 secundas cun pausas tranteren.
Pervia d'ina interrupziun dal sistem n'han ins dentant betg pudì manar tras il test da la sirena d'aua. Quai saja anc mai capità, uschia Bruno Casutt, substitut parsura da l'Uffizi sin dumonda envers RTR. La populaziun na stoppia dentant betg far quitads: en cas d'urgenza fetschian ins diever da l'alarm general. Ulteriurs tests da l'alarm d'aua na sajan betg planisads.
Quella sirena tuna uschia:
Sch'ins avess en il futur d’udir quest tun, duessan ins immediat bandunar il territori periclità, e suandar las instrucziuns da la vischnanca u da la polizia.
RR actualitad 11:00