Siglir tar il cuntegn

Header

video
Las ustarias en Grischun ston serrar a partir da venderdi saira
Or da Telesguard dals 03.12.2020.
laschar ir
cuntegn

Mesiras da corona Grischun serra ustarias per almain duas emnas

Tenor in scriver intern che n'è anc betg public, ha il chantun decis da serrar tut las ustarias per almain duas emnas. E quai gia a partir da damaun, venderdi, la saira a las 23:00. La media chantunala Marina Jamnicki ha confermà quellas mesiras.

  • furniziuns a chasa èn lubidas fin la saira a las 22:00
  • take-aways pon laschar avert fin las 22:00
  • ustarias da hotels èn be avertas per ils giasts da l'hotel

La raschun per quest lockdown da las ustarias a curta vista, saja il dumber dals cas actuals. Las infecziuns creschian u restian almain sin in nivel aut, uschia il facit dal cusseglier guvernativ, Marcus Caduff, en il scriver. La cifra da reproducziun en il Grischun è actualmain tar 1,02. Tenor l'Uffizi federal da sanadad stuess questa valur però esser sut 0,7. Il Grischun ha cunquai actualmain la quart auta cifra da reproducziun en Svizra. I saja uss temp d'agir, quai ha la media chantunala Marina Jamnicki ditg. E quai stoppian ins far là, nua ch'il ristg da s'infectar saja pli grond, sco quai ch'igl è il cas en ustarias.

Nus stuain sbassar las cifras per pussibilitar ina tscherta fatschenta da Nadal e d'enviern.
Autur: Marina JamnickiMedia chantunala

Las mesiras duain valair per almain duas emnas, pia fin mez december.

Cifras dals 3 da december

Avrir la boxSerrar la box
  • Il Grischun annunzia la gievgia 100 novas infecziuns aifer in di. 48 persunas èn actualmain ospitalisadas pervi da Covid-19, set dad ellas èn sin staziuns intensivas. En isolaziun sa chattan 766 persunas e 1'065 persunas èn en quarantina.
  • En l'entira Svizra ha il BAG registrà 4'455 novas infecziuns aifer las ultimas 24 uras. Vitiers communitgescha l'Uffizi federal da sanadad 80 ulterius mortoris e 194 novas entradas en ospitals.

La regenza grischuna infurmescha damaun a las 10:00 davart ils proxims pass. RTR emetta LIVE la conferenza da medias via rtr.ch e sin facebook.

Pauca chapientscha en la gastronomia

La branscha da gastronomia ha pauca chapientscha per ils plans da la regenza che vulan ch'ustrias siarran las portas per almain duas emnas.

Igl è puspè la gastronomia quella che vegn sut las rodas.
Autur: Franz Sepp CaluoriPresident Gastro Grischun

Franz Sepp Caluori, president da Gastro Grischun n'ha betg confermà che la gastronomia serria a partir da venderdi saira. El haja dentant bain chapientscha, ch'ins vul salvar la fatschenta da Nadal, ma sche quai saja la dretga strategia, metta el en dumonda. El è numnadamain persvadì, ch'ils concepts da protecziun funcziunan e che betg la gastronomia è la branscha problematica.

RTR novitads 14:00

Artitgels legids il pli savens

Scrollar a sanestra Scrollar a dretga