En ina communicaziun scriva il directur dal Parc Adula, Martin Hilfiker, ch’i na dettia naginas midadas da leschas e cunvegnas dad utilisaziun en la zona circumdanta. Las finamiras per in parc vegnissan realisadas en il rom dals plans directivs dal Grischun e dal Tessin en collavuraziun cun organisaziuns e persunas pertutgadas e perquai na vegnia a dar midadas.
La Pro Natura n'è betg la mesira per il Parc Adula
Plinavant punctuescha Hilfiker, che la mesira per il Parc Adula sajan ils cuntegns, che la societad Parc Adula haja fixà, e betg las aspettativas da la Pro Natura u autras uniuns. La societad represchenta las 17 vischnancas e las 5 regiuns ch’èn da la partida tar il project.
"In concept temelitg" di la Pro Natura
La Pro Natura e sias secziuns grischunas e tessinaisas s’aveva bain expressa per il project, ha dentant era crititgà la charta dal parc. Quella saja in concept mo a mesas e schizunt temelitg. La charta saja formulada uschia per evitar conflicts cun las differentas gruppas d'interess. Tranter auter saja il reglament per la zona da coc plain excepziuns per ils differents utilisaders - uschia la Pro Natura.
Enfin il prim da favrer avevan privats ed organisaziuns gì peda dad inoltrar lur posiziuns pertutgant la charta dal Parc Adula.
RR novitads 18:00