Durant la notg sin venderdi datti per part plievgia intensiva. Cunzunt en il nord dal chantun daratgia fermamain, localmain possia er in aual ir surora, quai di Ivo Sonderegger da SRF Meteo. En il decurs dal venderdi datti lura er naiv. En la Surselva dal nord, en il Scanvetg, il Partenz, Tavau e l'Engiadina Bassa possia quai dar 20 enfin 60 centimeters naiv sur 1'000 meters. Pli pauca naiv dettia en il Grischun central e l'Engiadin'Ota cun enfin 20 centimeters. Uschia èsi da quintar venderdi e sonda cun vias curcladas sur ils pass grischuns.
Sonda fasas suleglivas
En il decurs da sonda datti puspè inqual sclerida. Las temperaturas restan dentant bassas. A Cuira datti maximalmain 9 grads. Il cumenzament da l'emna mussava il termometer anc passa 20 grads en la chapitala. A partir da dumengia e l'emna proxima dettia aura variabla. Tenor Ivo Sonderegger possia tuttina anc dar qua e là in zic naiv. Ma betg pli tanta sco venderdi.