Quests dis vegni bletsch en l'entir Grischun. Quai suenter ina perioda fitg sitga e miaivla. Tenor Jürg Ackermann, metereolog da SRF saja l'avrigl stà memia sitg. Sch'i dettia uss ils davos dis dal mais anc in zic plievgia pudess quella gulivar or la statistica da plievgia.
En la regiun da Cuira èsi usità ch'i dat circa 50mm plievgia durant l'enviern. Enfin uss hai be dà radund 20mm. Ils proxims dis èsi dentant anc da quintar cun plievgia.
Naiv enfin 1'300 meters
En ils proxims dis èsi adina puspè da quintar cun plievgia, il bler datti en il Grischun dal nord. En il decurs da l'emna va er il cunfin da naiv a bass, enfin sin 1'300 meters en il Grischun dal nord e Grischun central. Uschia ch'i pudess vegnir alv en quellas regiuns en la notg da sonda sin dumengia.
«Nairas uras ch'i plova»
Er al Plantahof èn ins led ch'i dat uss ina fasa pli bletscha. Las temperaturas miaivlas e la setgira hajan laschà patir ers, pradas e cultiras. Cun la plievgia da quest'emna pudessi quella situaziun sa normalisar, manegia Georg Canova dal Plantahof. I saja dentant grev da far prognosas co la vegetaziun sa sviluppeschia vinavant. Ch'i savess er dar naiv e dar scheliras na vesa l'expert betg sco uschè grond problem. En la regiun da Cuira hajan plantas gia flurì ed hajan si fritgs, uschia che quellas possian vertir in zic pli fraid. Per regiuns pli autas saja dentant schon da sperar che las temperaturas giajan betg memia bass per evitar donns.
