Il clima sin nossa terra sa mida. In studi da l'uffizi federal per meteorologia prevesa ch'i dat il 2060 en Svizra 3-6 giadas dapli dis da chalira ch'anc oz (dis cun var 30 grads). Igl è era da quintar pli savens cun eveniments extrems sco incendis da guaud u inundaziuns.
I dat dentant era schanzas
Mardi saira ha Roland Hohmann da l'Uffizi federal per ambient referì a Cuira davart ristgs e schanzas da la midada dal clima. Oravant tut davart las schanzas vegn, per regla, discurrì pauc. I dat dentant singulas schanzas.
- Agricultura: Lezza profitescha – tut tenor – da relaziuns sitgas e chaudas. In bun exempel sajan las vignas, ha Roland Hohmann declerà. Plinavant hajan ins era la pussaivladad da cultivar fritgs exotics.
- Turissem: Il turissem da stad grischun po profitar da la midada dal clima. Cunquai ch'i vegn en il sid adina pli chaud, vegnian bleras persunas a decider da far vacanzas en las alps.
- Energia da stgaudar: Ils envierns vegnan pli chauds en il futur, uschia duvrain nus pli pauca energia da stgaudar, di Roland Hohmann. Quai haja in effect sin ils custs e plinavant er in effect positiv sin las emissiuns che van ora el liber.
RR actualitad 12:00