Siglir tar il cuntegn

Header

cuntegn

Chantun Midadas per la polizia

Las vischnancas na duain betg survegnir incumbensas da polizia supplementaras – la polizia communala duai dentant survegnir dapli cumpetenzas.

La regenza grischuna vul parter si pli cler las incumbensas polizialas en il chantun. La polizia communala na duai però betg survegnir incumbensas supplementaras. Ella duai dentant vinavant esser autorisada da procurar per quietezza, urden e segirezza.

Ultra da quai duai vegnir stgaffida ina basa legala che regla tgi che surpiglia ils custs ch'i dat, sche la polizia chantunala surpigliass las incumbensas da la polizia communala.

Surveglianza tras tut ils organs publics

Er tar il reglament da la surveglianza da persunas en il spazi public ed accessibel al public duai dar midadas: Davent dad uss na duai mo la polizia chantunala, mabain tut quels che lavuran tar in post ch'ademplescha incumbensas publicas survegliar persunas a moda visibla – premess ch'il basegn è avant maun.

Er tar la polizia chantunala duai en quest punct dar ina midada: la regenza vul stgaffir la basa legala per equipar la polizia cun apparats mobils che pon registrar e transmetter tun e maletg, uschenumnads bodycamps. Tals meds mobils duai la polizia chantunala pudair duvrar durant in'acziun per l'ina per procurar infurmaziuns e per l'autra per survegliar lieus generalmain accessibels. Las cameras duain tranter auter impedir attatgas sin ils policists, uschia communitgescha la regenza grischuna. L'uniun dals policists grischuns refusa dentant las cameras da corp cun l'argument che quellas violeschian ils dretgs persunals. Fin uss ha en Svizra sulet la polizia da la citad da Turitg fatg in'emprova da pilot cun bodycams.

Emprender dal passà

La finala duain er l'experientscha esser ina basa per la revisiun da la lescha da polizia. Quai cunzunt quai che pertutga: la protecziun da datas, las mesiras secretas preventivas da la polizia, l'obligaziun d'annunzia en cas d'expulsiuns per consequenza da violenza a chasa sco er la procedura chantunala da multas disciplinaras.

La regenza grischuna ha deliberà la missiva tar la revisiun parziala da la lescha da polizia per mauns dal cussegl grond.

RR novitads 14:00

Artitgels legids il pli savens