Mierta Capaul, la figlia da Duri Capaul e fin avant curt la presidenta da la fundaziun Capauliana n'è betg mo sa retratga sco presidenta mabain è insumma extrada dal cussegl da fundaziun. Quai perquai ch'ella na sappia sco figlia betg agir encunter ils interess da la fundaziun.
Dispita piglia nagin fin
Dapi la mort da Duri Capaul il 2009 vai per la dumonda a tgi che las passa 25'000 ovras d'art ch'èn vegnidas rimnadas tutgan. Mierta e sia sora Gada Capaul hajan fatg ina offerta generusa a la fundaziun. Tut las ovras rimnadas duan tutgar a la fundaziun cun excepziun da quellas che sa chattan en il Chasté da Lumbrein ed en la chasa paterna nua che las soras èn creschidas si. Il cussegl da fundaziun n'haja dentant mai dà ina risposta positiva sin questa offerta, uschia Mierta Capaul.
Nagin commentari dal cussegl da fundaziun
Il cussegl da fundaziun che consista uss ord l'advocat Gion Andri Decurtins ed il CEO da la banca chantunala dal Grischun Alois Vinzens na leva betg commentar quai. El punctuescha dentant ch'il cussegl da fundaziun saja obligà da represchentar ils interess da la fundaziun e ch'i na giaja betg per agens interess mabain sulet per il bun da la fundaziun e quai er en il futur. L'entschatta fenadur less il cussegl da fundaziun informar co i va enavant cun la fundaziun.