Tut las ovras stattan sut l'ensaina «Seria e Variaziun». In titel che tuna sin l'emprima egliada probabel pulit simpel. E gist quai haja fascinà il directur artistic dal museum Stephan Kunz, che ha tschernì tut las ovras per l'exposiziun. Malgrà ch'il tema tuna simpel, saja el en realitad fitg varià. Mintg'artist e mintg'artista interpreteschia tut auter ina seria u ina variaziun – ed uschia vegnian ensemen ovras fitg interessantas. Ed er sch’i na saja betg adina evident, lavurian artistas ed artists fitg savens cun serias e variaziuns e sviluppeschian uschia vinavant lur temas ed ovras.
Perquai avessi dà anc massa autras ovras ch’avessan pudì chattar in plaz en l'exposiziun. Quai sajan uss simplamain las ivettas ch'il directur artistic ha tschernì. Per el saja fitg impurtant dad adina puspè fufragnar en la collecziun dal museum – ina collecziun da passa 9’000 tocs. Uschia possian ins adina puspè dar nova vita a la collecziun.