Siglir tar il cuntegn

Header

cuntegn

Chantun Nadal senza naiv: Senza chanuns da naiv, naginas pistas alvas

Pastgiras verdas e spundas brinas enstagl da cuntradas d’enviern da siemi. Bunamain dappertut manca la naiv - e las prognosas n’empermettan betg meglierament. Il Radio Rumantsch fa ina tura tras il chantun Grischun a la tschertga da la naiv e d’alternativas.

Breil-Vuorz-Andiast: Ni ir cun skis ni cun scarsolas

Tar las pendicularas da Breil-Vuorz-Andiast SA per exempel n'èn naginas pistas avertas il mument. Dentant sajan las sendas da viandar signalisadas ed avertas en l’entir territori da skis. Propi problematic saja quai pir vegnì ils ultims dis. Avant hajan els fatg il meglier pussibel en questa situaziun.

audio
Bunura: Naginas pistas avertas a Breil-Vuorz-Andiast
ord Actualitad dals 21.12.2015.
laschar ir. Durada: 1 minuta 26 Secundas.

Ils dis ch’i saja stà fraid, hajan els pudì far naiv durant la notg. Mo uss cun questas temperaturas autas na saja quai betg pussaivel pli da far naiv artifiziala. Vitiers vegnia che las spundas vers sid sajan suleglivas.

Nus avain empruvà da far naiv sin intgins tschancuns, mo sche quai n’ha nagina naiv dasperas, è quai memia privlus dad ir cun skis.
Autur: Beat Zenklusen Directur pendicularas Breil-Vuorz-Andiast SA

La naiv lieuia là spert. «Sch’i fiss almain fraid avunda, lur pudessan nus ennavar las pistas sin 26 kilometers», manegia Beat Zenklusen, il directur da las pendicularas da Breil Vuorz Andiast. Aua persuenter haja quai scadin cas avunda, cunquai ch’els dovrian l’aua dal rempar idraulic.

Mustér: Senza naiv dovri creativitad

Las Pendicularas da Mustér n’han betg la pussaivladad da far naiv. Perquai dovri creativitad per porscher alternativas a l’ir cun skis. Lur finamira è d’almain avair ina purschida dad ir cun skis minimala per ils uffants. Perquai vegni fatg gronds sforzs declera il directur da las Pendicularas Mustér, Rudolf Büchi: «Nus sgrattain, en il vair senn dal pled, ensemen la naiv, uschia ch’i dat ina purschida per ils uffants.»

audio
Bunura: A Mustér duain almain ils uffants pudair ir cus skis
ord Actualitad dals 21.12.2015.
laschar ir. Durada: 3 minutas 14 Secundas.

I vegn rimnà tranter auter a maun la naiv sper pista e bittà quella cun in taglianaiv en la pista d’exercizi «Palius». Damai che quai è la suletta pista che po vegnir averta ston ins esser creativ. Uschè vegnia purschì turas cun gianellas, la pussaivladad da far bisquits, sendas da paraulas euv. Purschidas che vegnian adattadas tenor basegn

La fatschenta da Nadal e Daniev è gia ruinada.
Autur: Rudolf Büchi directur pendicularas da Mustér

Tenor Rudolf Büchi na vegn quai betg pli a dar quest onn naiv. Perquai che la perioda sitga saja dentant gia lunga quinta el ch’i dettia naiv sin la fin da schaner cura ch’i haja era blers giasts en la regiun.

Corviglia/Marguns: Investiziuns da 20 milliuns cumprovadas

naiv cun paucs skiunzs
Legenda: Corviglia/Marguns n'ha betg da reclamar, grazia al nov lai d'accumulaziun, hai dà avunda naiv artifiziala. RTR, A. Caprez

La regiun da skis Corviglia/Marguns sur Schlarigna/San Murezzan ha pudì realisar stgars 90% da las pistas. Quai grazia a l'aua dal nov lai d'accumulaziun. Successivamain èsi uschia previs d'avrir ils ultims 5 implants ch'èn anc serrads, grazia a la naiv artifiziala dals passa 200 chanuns da naiv.

Turant ils dis da festa spetgan ins uschia ina cumulaziun da glieud sin la pista. Tenor Armon Godly, ch'è responsabel per ennevar tar la Engiadin San Murezzan Mountains SA, èn ins pront per las massas. Per la «cosmetica» fissi bain bun d'avair naiv natirala. Per las frequenzas sin las pistas creadas dovri tenor el però surtut bel'aura.

video
Alternativas per la naiv
Or da Actualitad dals 21.12.2015.
laschar ir. Durada: 2 minutas 7 Secundas.

Downhill – l’alternativa tar ir sin pista

Che la naiv manca en il Grischun ha per in u l’auter era avantatgs. Uschia per exempel per quels che van gugent cun velo da taissas spundas giuadora. A Cuira per exempel èsi pervia da la mancanza da naiv anc adina pussibel dad ir cun velo da downhill.

Dus ch’èn era ussa anc adina savens en il parc da bike Cuira-Brambrüesch èn Patrick Murschel (27) e Christian Lüscher (31). Els dian che ir cun velo da downhill saja propi l’alternativa optimala tar il ir sin pista. I saja perfin sumegliant. «Sco sin pista, van ins era en il downhill davent da sisum enfin giusut», di Christian Lüscher.

Spezial durant il temps da Nadal

Cler saja quai spezial dad ir cun velo per la muntogna curt avant Nadal. Ma tar l’aura actuala saja quai meglier che ir cun skis u aissa sin naiv artifiziala, manegia Patrick Murschel. Downhill è la gronda passiun dad els dus. Ma tuttina: era Patrick Murschel e Christian Lüscher n’avessan nagut encunter sche la naiv vegniss plaunsieu.

Artitgels legids il pli savens