La regenza grischuna na vul il mument betg crear novas pussaivladads per il persunal chantunal d'annunziar a moda zuppada chaussas che na funcziunan betg. La fracziun social-democratica dal Cussegl grond aveva dumandà la regenza da stgaffir in servetsch da mediaziun extern per il persunal chantunal – quai suenter las restructuraziuns dal Museum d'art dal Grischun. La degradaziun temporara dal directur dal museum Stephan Kunz avevan procurà per gronda critica envers l'Uffizi da cultura.
La regenza dal Grischun ha uss respundì, ch'il chantun haja il 2010 gia desistì da crear la pussaivaldad dal whistle-blowing. Ed actualmain haja il chantun plirs posts interns per annunziar situaziuns insupportablas en l'administraziun. Perquai propona la regenza al Cussegl grond da betg surdar l'incumbensa da la fracziun da la PS.
RR novitads 11:00
