Siglir tar il cuntegn

Chantun Nagins cas da tuberculosa tar selvaschina grischuna

Controllas en ils chantuns Grischun e Son Gagl ed en il Liechtenstein han mussà ch'i na dat en questas regiuns nagins indizis che la selvaschina è pertutgada da la malsogna tuberculosa.

In tschierv sajettà sper in flim.
Legenda: La selvaschina grischuna n'ha betg tuberculosa. Quai han controllas durant la chatscha dal 2017 mussà. Keystone

La selvaschina en la Svizra Orientala n'ha betg tuberculosa. Quai demussan examinaziuns tar 237 animals en ils chantuns Grischun e Son Gagl sco er en il Principadi da Liechtenstein. Quellas èn vegnidas fatgas durant la perioda da chatscha dal 2017 e sur in territori da surveglianza specific. En il Grischun han ins intercurì animals en il Partenz, en il nord dal flum Landquart ed en Engiadina Bassa. Sco l'uffizi per controlla da mangiativas e fatgs da veterinari da Liechtenstein communitgescha, èn vegnids controllads tant animals sajettads sco era selvaschina disgraziada.

Las examinaziuns èn cunzunt vegnidas realisadas pervi da la situaziun inquietanta da tuberculosa tar tschiervs en il Vorarlberg. Quest project da surveglianza datti dapi il 2014, e quel vegn er manà tras durant la proxima stagiun da chatscha.

RR novitads 11:00