Siglir tar il cuntegn
Inhalt

Chantun Nagins transports da laina da 44 tonnas

I na dat nagin'excepziun per il forestalesser: Il Cussegl dals chantuns refusa transports da laina da 44 tonnas – enstagl da 40 tonnas sco actualmain. La branscha grischuna avess da principi beneventà l'idea.

Il maletg mussa in cran ch'è vida chargiar laina sin in vehichel.
Legenda: Dal guaud enfin l'elavuraziun vegn la laina grischuna chargiada enturn pliras giadas. Keystone

Transports tutgan al mintgadi en il forestalesser svizzer. L'emprim transport suenter il tagl en il guaud succeda per camiun. Silsuenter pon ins savens chargiar la laina sin in vehichel pli grond. Cun lubir transports da 44 tonnas pudess la branscha spargnar custs, viadis ed emissiuns, ha argumentà il cusseglier naziunal Jean-François Rime (PPS) l'intenziun da sia moziun. Quella è ussa dentant giud maisa: Il Cussegl dals chantuns ha refusà ella unanimamain.

Da princip ina bun'idea per il Grischun

La proposta avess chattà sustegn en la branscha da laina dal Grischun. Natiralmain ch'ins na possia betg charrar dapertut cun camiuns da 44 tonnas, di Nina Gansner, mainafatschenta da la Selva, l'uniun dals proprietaris da guaud dal Grischun. Sin bleras vias saja pussaivel da charrar be cun chargias da 18 u 28 tonnas. E tuttina: Sch'i fiss pussaivel da spargnar custs en tscherts lieus, saja quai da beneventar.

Da quest avis è era Lüzzi Andri da la firma Reziaholz GmbH, che cumpra e venda laina radunda. Gist per il forestalesser en il Grischun sajan ils transports lungs e chars, cunquai che la gronda part da la laina vegnia exportada en l'exteriur. Perquai fissi bun da pudair far pli paucs, persuenter pli grevs transports.

«Quai chaschuna custs per mantegnair las vias»

Sco anteriur cusseglier guvernativ dal Grischun ha Stefan Engler (PCD) bain chapientscha per la pretensiun. Sco cusseglier dals chantuns haja el dentant stuì considerar avantatgs e dischavantatgs. Ed el saja vegnì a la conclusiun ch'ils donns ch'ils camiuns pli grevs chaschunassan sin las vias sajan memia gronds. Perquai refusa el la moziun.

Era il Cussegl federal è stà cunter l'idea d'auzar ils transports da laina da 40 sin 44 tonnas. El tema tranter auter ch'era ulteriuras branschas da transport pudessan far valair ils medems basegns.

RR actualitad 11.00