Siglir tar il cuntegn

Header

Navigaziun

Purtret d'in criec che rumegia naiv ed in irun grisch ch'è a la chatscha.
Legenda: Dus dals quitads per ils pestgaders: Las vischnancas che mettan la naiv ch'i na san betg nua ir cun tut en ils flums, e l'irun grisch che pestga davent ad els ils peschs. Keystone
cuntegn

Chantun Naiv tschuffa e l'irun grisch: dus gronds quitads dals pestgaders

Dasper ils quitads usitads sco dispitas cun ovras idraulicas e la midada dal clima vegnan anc vitiers quitads, perquai che naiv tschuffa vegn bittada en ils flums e l'irun grisch che mangia davent ils peschs als pestgaders.

Sal e particlas da chadainas e frains

Entras la rumida da naiv durant l'enviern vegn blera naiv tschuffa en ils flums. Problem è ch'era sal e particlas da chadainas e da frains sa tschentan uschia en l'aua. Tar il chantun èn ins bain pertschert da la problematica. La materia che vegnia uschia en l'aua, possia midar la concentraziun da sal e da substanzas nuschaivlas da l'aua.

Er il collavuratur scientific dal chantun, Marcel Michel ch'è responsabel tar l'Uffizi da chatscha e pestga è absolut da l'avis ch'insatge stoppia vegnir fatg. En realitad saja dentant grev da reagir, cura ch'i dettia en il chantun blera naiv sin in mantun. El appellescha a la chapientscha d'omaduas varts: Ins stoppia chapir quels che hajan da garantir la segirezza, ma er ch'ils flums na sajan betg in lieu, nua ch'ins possia simplamain dismetter rauba. Ensemen cun l'Uffizi da natira ed ambient sajan ins dentant vidlonder da chattar meglras soluziuns per il futur.

L'irun grisch mangia davent blers peschs

Tema a la radunanza dals pestgaders grischuns è er stà l'irun grisch. L'utschè grond e grisch è periclità en Svizra ed è perquai sut protecziun.

Purtret d'in irun grisch che sgola.
Legenda: Keystone

El mangia dentant davent als pestgaders ils peschs – quai almain en val Tujetsch, ha declerà il president da l'uniun da pestgaders, Norbert Vincenz. Surtut problematic saja ch'el possia tschiffar peschs er en lieus, nua ch'i saja pli grev da vegnir tiers ed er cura ch'igl haja pauca aua.

Marcel Michel relativescha dentant. Tut en tut n'hajan ils iruns grischs en Svizra dentant tant sco nagina influenza sin ils peschs. Ensemen cun tut ils auters problems ch'i dat en connex cun la pestga, possia l'irun grisch avair in effect decisiv. Cunquai che l'utschè saja protegì, na possia il chantun dentant betg far bler.

RR actualitad 17:00