Las 16:45 sa scuntran Gabriella Binkert-Becchetti (PPS) e l’anteriur derschader federal, Giusep Nay, a Cuira davant la Chasa RTR.
L’atmosfera è amicabla e cun Parc Adula dad ina e reservat Biosfera da l’autra vart è er prest chattà ina tematica communabla, nua che nagin dad els dus n'ha anc da metter sias chartas sin maisa.
Quai capita pir en il discurs live en il studio dal Telesguard.
L’iniziativa per il repatriament effectiv dad esters criminals vul...
... che persunas, che commettan in tschert delict (p.ex. mazzament u cugliunaria greva), han da bandunar la Svizra.Quai independentamain da quant grev che lur delict vegn valità, e quant aut ch’il chasti è.
Mess il cas che la persuna è gia vegnida condemnada ina giada ils davos 10 onns, basta er in delict pli pitschen (p.ex. smanatschar autoritads u sfalsifitgar documents) per stuair bandunar la Svizra.
Las reglas novas duajan vegnir francadas directamain en la constituziun federala. Questas reglas duajan survegnir prioritad envers tut ils dretgs internaziunals, che n’èn betg absolutamain obligatorics.
Pro iniziativa - ils aderents èn da l’avis che ...
- l’iniziativa pertutgass mo, tgi che cuntrafetschia la lescha
- il repatriament automatic e senza excepziuns dessia ina segirezza da dretg
- ils derschaders vegnissian distgargiads
- ils repatriaments daventassian pli gists
Contra iniziativa - ils adversaris èn da l’avis che ...
- l’iniziativa è ina iniziativa che priveschia da dretgs
- la PPS sutminassia il stadi da dretg
- il repatriament fissia valaivel era tar delicts da bagatella
- il princip da commensurabladad manchia
