Siglir tar il cuntegn

Chantun «nossaistorgia.ch» la nova plattafurma istorica dal Grischun

Vulais era Vus parter Voss archivs cun auters? Avais Vus fotografias, da las qualas Vus vulessas gugent savair dapli? Participai era Vus a la nova plattafurma istorica.

Plattafurma nossaistorgia.ch.
Legenda: Plattafurma «nossaistorgia.ch» Pagina d'entrada da la plattafurma «nossaistorgia.ch» RTR

«nossaistorgia.ch» è l’emprima plattafurma digitala, istorica e participativa da la Svizra rumantscha e dal Grischun. Privats ed instituziuns mettan online lur archivs cun la finamira da segirar communablamain la memoria collectiva da noss chantun.

A partir dals 3 d’october 2017 è la pagina «nossaistorgia.ch» disponibla online. Ella sa drizza ad interessads privats, ad instituziuns ed era a las scolas. La finamira è da crear ina cuminanza d'utilisaders che skizzescha e reconstruescha muments istorics da la Svizra rumantscha e dal Grischun. L’idea è plinavant da parter istorgias persunalas – e da ramassar bleras regurdientschas, ina vasta paletta d'interess e da puncts da vista e da gidar en quella moda a furmar ina ferma cuminanza.

Mintgin po crear, s’annunziar gratuitamain e contribuir a quest grond project collectiv: cun interagir e cun commentar documents, cun publitgar atgnas fotografias, films, registraziuns da tun u auters documents. Plazzai ina foto da Voss basat, in film da la construcziun da la chasa da scola u ina registraziun dal concert da la musica sin la nova plattafurma e daventai uschia perditga da l’istorgia da la Svizra rumantscha e dal Grischun.

Legende: Video «nossaistorgia.ch» – l'archiv online per in e scadin abspielen. Laufzeit 3:17 Minuten.
Or da Telesguard dals 03.10.2017.

La plattafurma «nossaistorgia.ch» è in project da RTR, sviluppà a basa d’in project da Radiotélévision Suisse (RTS) e da la Fundaziun per il mantegniment dal patrimoni audiovisual da RTS (FONSART).

RR actualitad 12:00