Il chantun Grischun gida las vischnancas da concepir las fermadas da bus, tenor ils basegns da persunas cun impediments. Quai ha communitgà la regenza. Las fermadas ston vegnir concepidas uschia che persunas cun impediments pon duvrar persul il traffic public.
Sustegn da lavur e quintar
En il chantun Grischun èn las vischnancas responsablas per la construcziun e l'adattaziun da las fermadas. Cunquai che plirs uffizis chantunals èn involvids sustegn il chantun l’entira procedura. Il departament chantunal da construcziun, traffic e guaud ha laschà elavurar in agid per lavurar e quintar. Quest agid duai sustegnair las vischnancas d'elavurar tge fermadas che ston vegnir adattadas e co ellas duain vegnir adattadas.
Vischnancas duain annunziar quantitad da projects
En il chantun datti radund 1'400 fermadas ed en tut 2'800 fermadas ad urs da vias. Las vischnancas vegnan supplitgadas d'annunziar al chantun fin la fin da quest onn quantas fermadas che ston vegnir adattadas. Uschia possia il chantun calcular ils custs per tut las midadas.
RR novitads 11:00