Siglir tar il cuntegn

Chantun Nov center da transit a Litzirüti fa surstar Arosa

La vischnanca dad Arosa è surstada ch'i duai dar a Litzirüti in nov center da transit per requirents d'asil. Quai ha il vicepresident communal Peter Bircher ditg ad RTR.

Legende: Video A Litzirüti endrizza il chantun in center da transit per requirents d’asil abspielen. Laufzeit 02:53 Minuten.
Or da Telesguard dals 23.03.2015.

El spetgia ussa ch'il chantun ed il cusseglier guvernativ Christian Rathgeb infurmeschian da rudent la vischnanca e la populaziun. Ils d’Arosa e da Litzirüti veglian savair tge influenza ch'il center d'asil haja. La regenza grischuna planisescha a partir da l'october in center da transit per requirents d'asil en la chasa da vacanzas «Valbella» a Litzirüti, il vitget avant la vischnanca dad Arosa.

«Nus duvrain il center sch'i dat dapli dumondas»

Ils ultims onns haja il chantun gì da dar suttetg a circa 600 requirents d'asil ad onn, declera il cusseglier guvernativ Christian Rathgeb. Sche las dumondas d'asil restian sin quest livel, possia il chantun laschar il center a Litzirüti sco reserva. Sch'i dettia dentant dapli requirents d'asil, lura saja il chantun pront.

L’onn current quinta il chantun che la Confederaziun attribueschia ad el ulteriurs 800 requirentas e requirents d’asil. Per garantir la capacitad d’alloschi prenda il chantun perquai en locaziun la chasa da sport e da vacanzas «Valbella» a Litzirüti, quai a partir dal 1. d’october 2015. Quest center da transit vegn avert pir cura che tut ils auters alloschis collectivs dal chantun èn occupads.

Possessurs han offrì il bajetg al chantun

La chasa da vacanzas a Litzirüti è en possess da la «Sport- und Ferienhaus Litzirüti SA». Damai che l'avegnir ed eventuals custs sajan stads intscherts, sajan els sa decidids d'offrir l'immobiglia al chantun. Quai ha il president dal cussegl d'administraziun Toni Brunold confermà ad RTR.

Il manader actual da la chasa da vacanzas «Valbella», Roger Waldmeier, accepta la decisiun - è dentant trumpà. Dapi 2 onns e mez haja el bajegià sin ina gestiun che funcziunia, ed el haja era gia reservaziuns per l'enviern proxim. Ussa stoppia el guardar da reglar tut enfin l'october, e lura tschertgar ina nova sfida persunala.