Siglir tar il cuntegn
cuntegn

Chantun Nov stadion da ballape a Cuira s'entardescha per plirs onns

La halla da chavaltgar SA e la citad da Cuira n'han betg chattà in cumpromiss. Curt suenter la votaziun e l'acceptaziun dal project «Eisball» eran atgnamain omaduas partidas da buna speranza, ch'els chattian ina soluziun.

Purtret d'in ballape giun plaun.
Legenda: La nova plazza da balla a Cuira s'entardescha. Pixabay
  • La halla da chavaltgar resta fin il 2023 sin l'areal Obere Au.
  • Il stadion da bal po pir vegnir construì cura che la halla è stgarpada giu ed è uschia betg terminà avant il 2025.
  • I na dat uschia nagin sustegn finanzial da la citad per ina nova halla da chavaltgar.

Nagin cumpromiss tranter las duas partidas

Curt suenter la votaziun e l'acceptaziun dal project «Eisball» eran atgnamain omaduas partidas da buna speranza ch'els chattian ina soluziun. Uss vulan ils acziunaris da la halla da chavaltgar a Cuira dentant tuttina betg bandunar avant che necessari l'areal Obere Au e restar là tochen ch'il contract da dretg da construcziun scada fin dal 2023. Quai munta, ch'els na survegnan betg ina summa d'indemnisaziun da la citad per construir ina nova halla.

Nov stadion da bal s'entardescha

En cas ideal avess il project «Eisball» gì dad esser a fin il 2021. Cun quai che la halla da chavaltgar ha in contract da restar fin il 2023, sa stauscha il termin per la nova halla. Quella po ussa vegnir realisada il pli baud fin l'entschatta 2025. Pia circa trais onns e mez pli tard che planisà. La societad da la halla da chavaltgar na saja betg stada cuntenta cun la plazza tar la Untere Au che la citad avess mess a disposiziun. Er ils 300'000 francs che la citad ha fatg a mogna n'haja la societad betg vulì. Quests daners avess la citad pudì spargnar cun betg stuair construir il project en etappas.

Realisaziun en etappas

Il project vegn uss realisà en pliras etappas. La halla da sport nova n'è betg pertutgada da la halla da chavaltgar. En in emprim pass vegnan realisads la halla da sport e pliras plazzas cun pastget natiral. L'emprima etappa duai esser a fin l'avust 2021.

La segunda etappa po pir vegnir realisada cura ch'il contract cun la halla da chavaltgar curra or. Quai è il 2023. Lura duain las tribunas principalas e la plazza principala vegnir realisadas. L'avertura duai lura esser il 2025.

RR novitads 12:00