Las midadas dals basegns da mobilitad pretendan in'extensiun da l'urari; vul dir dapli colliaziuns la bun'ura e la saira. La Confederaziun ha perquai elavurà schliaziuns ensemen cun las interpresas da transport. Quai ha l'Uffizi da traffic ed energia dal chantun Grischun communitgà il glindesdi.
Evitar largias sin la lingias principalas
Il nov urari prevesa uschia in tren supplementar da las Viafiers federalas a las 17:07 davent da Turitg a Cuira cun colliaziun a San Murezzan, Tavau ed en la Surselva.
Ma era la Viafier retica vegn ad extender sia purschida. Las lingias en direcziun Arosa e Surselva vegnan cumplettadas, uschia ch'i dat tranter Mustér e Cuira da las 06:00 enfin las 23:00 almain mintg'ura e durant il temp da grond traffic perfin mintga mes'ura in tren. Era Arosa duai survegnir tranter las 05:00 e las 21:00 mintg'ura ina colliaziun cun Cuira e durant da la stagiun auta duai l'urari anc vegnir extendì. Plinavant datti sin la rait d’autos da posta uss il tact da mes’ura sin la lingia da Cuira a Flem/Laax.
Colliar pli ferm la periferia
Or da l’Engiadina datti da nov in tren gia curt avant las 05:00 a bun’ura da Samedan a Landquart. Ed era il Puschlav survegn durant il temp da stad ina colliaziun sperta la damaun a las 06:00 enfin Cuira. Quai scursanescha il viadi da Poschiavo a Turitg per 42 minutas. Per la Tumleastga e per Tusaun è previs ina meglieraziun da las colliaziuns la saira enfin las 23:00.
Nagins supplements per uras agl ur
Il supplement ch'ins pajava enfin ussa per il traffic public da notg vegn abolì. Uschia duai mintga bigliet normal, inclus BÜGA e GA valair per tut las uras senza supplement. Era per ils trens cun cumposiziuns da nostalgia che charreschan la stad 2018 tranter Tavau e Filisur na duain ins betg stuair pajar dapli.
RR novitads 10.00