Siglir tar il cuntegn

Header

plirs autos da posta èn parcads a Cuira
Legenda: Er per ils autos da posta datti dapli lavur cun la midada d'urari. Keystone
cuntegn

Nov urari dal traffic public Grischun survegn ulteriuras colliaziuns

Cun la midada da l'urari ils 15 da december 2019 survegnan quasi tut las regiuns dal chantun Grischun ulteriuras purschidas da tren e da bus.

Per la viafier vegn la purschida extendida il pli fitg sin il traject Landquart – Tavau. Qua resulta – en spezial durant las fins d'emna – in tact da mes'ura quasi nuninterrut. En il sectur dals bus vegnan serradas largias en il tact sin intginas lingias ed extendidas las purschidas durant las uras marginalas.

Viafier retica

Sper l'augment dal tact tranter Landquart e Tavau datti er trens supplementars tranter Claustra e Tavau durant ils temps principals da traffic. Durant la stad vegn schlargiada la purschida da trens d'aventura tranter Rehanau-Tumein e Glion.

Extensiun purschida da bus

Davent da Tusaun en direcziun da la Mantogna dadens e dadora datti in tact d'ina ura nuninterrut, e la Val Sertig survegn da nov in tact da mes'ura durant la stagiun da stad. Da la Val Mesauc po Cuira vegnir cuntanschì da nov la damaun avant las 08:00, quai grazia ad ina nova colliaziun da baud. Durant la stagiun da stad cursescha mintga di in curs nonstop Cuira – Bellinzona, las butias ad Isla Schluein survegnan da nov ina colliaziun da bus ed Urmagn Sura vegn en l'avegnir er collià durant l'enviern cun il traffic public. La Val Müstair survegn in curs da baud durant l'enviern. Per Laax e per Lai datti durant l'emna ina nova colliaziun da tard cun in bustaxi davent da Cuira. A Claustra circuleschan il venderdi e la sonda saira sco er mintga di durant la stagiun d'enviern in bustaxi mintga ura sin il traject Claustra Plaz – Serneus – Saas. Haldenstein survegn ina nova colliaziun da baud cun bus e Favugn ina nova colliaziun da tard per Cuira.

RTR novitads 12:00