Siglir tar il cuntegn

Header

purtret da l'uvestg durant in predi.
Legenda: Joseph Bonnemain. Keystone
cuntegn

Nov uvestg Bonnemain elegì per almain 5 onns

Il papa Francestg ha elegì avant in'emna Joseph Bonnemain sco nov uvestg da Cuira. En dus onns e mez avess el gia 75 onns e stuess cun quai inoltrar sia demissiun al papa. Uss ha il Vatican communitgà che Bonnemain saja elegì per almain 5 onns, quai scriva il portal online Kath.ch.

Blers vesan Joseph Bonnemain sco in uvestg transitoric a Cuira. El duai esser quel che porta puspè ruaus ed unitad. Ma uss è er cler che la transiziun duai cuzzar almain 5 onns. Papa Francestg ha nominà el per 5 onns perquai che la situaziun en l'uvestgieu saja cumplexa.

Enfin che Bonnemain entra en uffizi, maina l’administratur apostolic Peter Bürcher vinavant la diocesa cun radund 700'000 commembras e commembers.

Ils blers uvestgs prolungheschan

La decisiun porta segirezza a l'uvestgieu da Cuira. Joseph Bonnemain na sto betg – sco uschiglio usità tar il dretg da la baselgia – inoltrar sia demissiun cun 75 onns. De facto èsi dentant en ils pli paucs cas a fin cun 75 onns. Per il solit lascha il papa prolungar ils uvestgs per dus onns. Er Vitus Huonder è stà dus onns pli ditg en uffizi. Ed er ses antecessur Amedée Grab, aveva manà l'uvestgieu anc 5 mais suenter ses 77avel anniversari, quai sco administratur apostolic.

audio
Per tadlar: las novitads da las 12:00
04:44 min, RTR Audio dals 22.02.2021.
laschar ir. Durada: 04:44 minutas.

RTR novitads 12:00

Artitgels legids il pli savens

Scrollar a sanestra Scrollar a dretga