Siglir tar il cuntegn

Chantun Nova cumparsa online per il chantun Grischun

Pli svelta, pli simpla, pli multifara. Quai duai esser la nova pagina dal chantun «www.gr.ch».

Purtret da la nova pagina.
Legenda: Uschia vesa la nova pagina ora. MAD

Adina dapli persunas dovran l'internet e tschertgan infurmaziuns en quel. Il dumber da visitaders sin la pagina dal chantun è creschi da 1,2 milliuns ad onn sin 4 milliuns ad onn u 11'000 visitaders per di. Per quest motiv ha il chantun ussa investì en in nov design per la pagina d'internet.

Durant 9 mais eran radund 100 lavurers da 45 organisaziuns involvids en las lavurs per la nova cumparsa online dal chantun. Per agid extern sajan vegnids investids 260'000 francs, tut ad interpresas u persunas dal Grischun.

Centrala saja la nova funcziun da tschertgar. Ella duai manar svelt e simpel a las infurmaziuns giavischadas. Las paginas duvradas il pli savens èn da chattar gist sin l'emprima pagina. Tgi che tschertga pli gugent sur temas, po far quai cun ils 6 temas principals ed uschia vegnir a las infurmaziuns tschertgadas.

Damai che bleras persunas tschertgan las infurmaziuns ozendi sin lur apparats mobils, èn quellas accessiblas bain er da quels apparats. L'access a las infurmaziuns è radund trais enfin quatter giadas pli svelt. La pagina è vinavant accessibla en tut las linguas chantunalas ed en cas spezials era en englais.

In video online mussa co che la nova pagina è structurada.

RR novitads 17:00