Nova partida - novs impuls?

La Partida-Turissem.ch, ch'è vegnida fundada la sonda passada a Cuira, ha l'intent da sustegnair ils politichers e las politicras che s'engaschan per il turissem. En il Grischun vegn dentant dubità sch'i ha vairamain duvrà questa partida. Las reacziuns èn perquai era plitost moderadas.

Il minister d'economia, Jon Domenic Parolini, è dal maini ch'i saja allegraivel ch'i dettia ulteriurs exponents che s'engaschian per il turissem. Sch'i haja fatg da basegn da fundar gist ina partida saja in'autra dumonda. Parolini è dal maini ch'i saja d'unir las forzas ed da coordinar l'engaschi. El vesiss perquai ina collavuraziun pli stretga cun la ITG, la cuminanza d'interess per il turissem Grischun.

Il vicepresident da l'ITG, Jürg Michel, avess era beneventà sch'els fissan vegnids contactads ordavant ch'i vegnia fundà ina partida nova. Era Michel è dentant dal maini ch'ina tala partida n'avess betg fatg da basegn, cunquai che l'engaschi per il turissem na giaschia betg vidlonder ch'i dettia memia paucas partidas.

La mancanza saja plitost la coordinaziun da l'engaschi. El vegnia perquai a tschertgar il contact cun ils exponents da la partida turissem.

Lobbing dal turissem è flaivel

Pascal Jenny, il president da la partida turissem è pertschart ch'i dettia persunas che na vesan il senn da questa partida. Els sajan dentant persvadì che gist questa furma saja la dretga per chattar attenziun. Els veglian ussa entgaminar questa via e lura sa mussia sche quai saja la dretga u betg. Il problem central dal turissem saja che differents politichers a Berna cumbattian per interess particulars dal turissem, i manchia in ferm lobbing.

Quai conferma era Andreas Deuber, il manader ad interim da l'institut da turissem a la HTW a Cuira. Savens saja uschia ch'ils turistichers neutraliseschian in l'auter pervi da differentas posiziuns. Perquai beneventa el da principi l'engaschi da Jenny e ses collegs da fundar questa partida. Sch'i grategia dentant a questa partida d'unir las forzas saja in'autra dumonda. Gist quai emprovia numnadamain la federaziun svizra dal turissem gia dapi onns e quai cun pitschen success.