Siglir tar il cuntegn

Header

Isabella Wieland, Annina Campell, Maria Victoria Haas e Livio Foffa en il studio.
Legenda: Il nov team dal Telesguard - Isabella Wieland, Annina Campell, Maria Victoria Haas e Livio Foffa. RTR
cuntegn

Chantun Novas fatschas tar il TSG

La squadra da moderaziun dal TSG è danovamain cumpletta. Tar Isabella Wieland e Maria Victoria Haas rivan Annina Campell e Livio Foffa. A partir dal mars èn ils 2 novs en acziun. In’autra novaziun spetga la stad che vegn: RTR ha decidì da far in test cun in Telesguard era durant la stad.

Annina Campell, 31, da Cinuos-chel, ha lavurà avant la camera per ServusTV e Red Bull TV. Tar SRF han ins vesì ella dapi 2012 en ils formats «SRF bi de Lüt – LIVE» sco reportra ed en «Das Experiment – wo ist dein Limit» sco moderatura. En il «Telesguard» sa preschenta Annina Campell l’emprima giada ils 24 da mars 2016.

Livio Foffa, 45, da la Val Müstair, è dapi onns la vusch da la damaun dal «Radio Rumantsch». El è engaschà dapi 1995 tar RTR, ha lavurà sco moderatur e redactur per differents formats, ha manà la redacziun da sport ed ils ultims onns era la moderaziun da radio.

Livio Foffa lavura -sper sia nova incumbensa tar il «Telesguard»- vinavant per il Radio Rumantsch.

Telesguard era la stad

In’autra novaziun spetga la stad che vegn sin aspectaturas ed aspectaturs: Sin giavisch da bleras vuschs or dal public ha RTR decidì da far in test cun in Telesguard era durant la stad. Il format è anc en svilup. Emess vegn el durant l’emna curt avant las 18:00 sin SRF1.

Purtret da Ladina Heimgartner
Legenda: RTR
Sco interpresa publica stattan ils basegns da noss public per nus en il center.
Autur: Ladina HeimgartnerDirectura RTR

Ladina Heimgartner, directura RTR: “Sco interpresa publica stattan ils basegns da noss public per nus en il center. Jau m’allegrel da pudair realisar quest giavisch da noss public e che nus possian raquintar era durant la stad tge che marscha en Svizra rumantscha.”

Sch’il Telesguard da stad vegn realisà era en l’avegnir u sch’i resta tar il test durant la stad 2016 vegn decidì suenter la stad.

Dapli da Grischunavrir la Landingpage

Nach links scrollen Nach rechts scrollen