Siglir tar il cuntegn

Header

audio
Novs campadis en Partenz
Or da Actualitad dals 07.05.2021.
laschar ir. Durada: 02:38 minutas.
cuntegn

Novs campadis en Partenz La dumonda è gronda – las sfidas er

En il Partenz, nua ch'i dat sulettamain a Grüsch in campadi, datti plans per engrondir la purschida da camping. Campadras e campaders ston però anc avair pazienza.

Il plan è: In nov campadi a Claustra, in a Pany ed ina pli gronda purschida tar l'implant «Rinerlodge» a Tavau Glaris. Per la realisaziun ston però anc diversas instanzas dar glisch verda. Enfin l'entschatta avrigl ha la procedura d'exposiziun per ils plans directivs dals novs campadis en il Partenz cuzzà.

Da vischnanca tar vischnanca auter

A Claustra duai dar in campadi al lieu «Lengland». Quel lieu è vegnì elegì ord 12 differents lieus. Per ils plans da construir in campadi a Pany ha quai dà objecziuns, na be dad abitantas ed abitants, mabain er dal WWF. Er per l'engrondiment dal campadi a Tavau Glaris datti protests da l'organisaziun da protecziun d'ambient.

Il plan directiv è la basa per ils proxims pass dal proceder.
Autur: Georg Frommsviluppader regiunal, Partenz-Tavau

Tenor Georg Fromm, sviluppader da la regiun Partenz-Tavau, saja grev da dir cura ch'i vegnia decis davart ils campadis. Uss saja la balla tar las vischnancas. Sulettamain per la vischnanca Claustra prognostitgescha Georg Fromm ch'il project ha ina schanza realistica.

Georg Fromm, il sviluppader da la regiun Partenz-Tavo
Legenda: Georg Fromm Sviluppader da regiun, Partenz-Tavau Georg Fromm

Insumma saja il process per in nov campadi magari lung, declera Georg Fromm. Diversas instanzas ston approvar il project, avant che la vischnanca po cumenzar cun las lavurs da construcziun. Suenter la procedura d'exposziun stoppia la conferenza da presidents deliberar il plan directiv. La proxima instanza saja lura la regenza.

Gronda dumonda suenter campadis

La dumonda suenter campadis è actualmain gronda. Tenor Gerry Meyer da la societad Wohnmobilland, sajan registrads 71'000 rulottas en Svizra. Sco l'onn passà pon ins pervi da la situaziun da pandemia er queist onn spetgar campadis plains.

Nus stuain risguardar quels giavischs da campadis. Igl è in segment fitg dumandà.
Autur: Georg Frommsviluppader regiunal, Partenz-Tavau

Stad 2021 – La schanza per in onn da record

Avrir la boxSerrar la box

La stagiun che stat avant porta empermetta da daventar anc meglra che quella dal 2020, hai num tar il Touring Club Svizzer TCS, il pli grond purschider da campadis en Svizra. En Grischun maina il TCS ils campadis a Mustér San Murezzan, Samedan e Scuol. Actualmain noda il TCS dapli reservaziuns ch'en media da quel temp, hai num sin dumonda. Er sch’ins na possia anc betg communitgar cifras detagliadas, dettia quai en egl ch’ils campadis sajan betg be occupads meglier durant il temp da vacanzas da scola, mabain er tranter stagiun.

Emprimas dumondas per reservaziuns sajan gia vegnidas il december. Dumandà sajan plazs fixs, hai gì num tar divers campadis che RTR ha contactà. A Silvaplana per exempel èsi perfin vegnì tratg la sort per ina part dals plazs. Singuls campadis han er adattà la grondezzia da las parcellas per porscher a dapli persunas in plaz da campar. Intgins èn gia uss occupads cumplettamain e puspè auters èn sa decidids per la varianta da «first come, first serve». Uschia possian ins dar a daplirs la pussaivladad per in plaz. En Grischun datti circa 40 campadis uffizials cun in manaschi.

Er Georg Fromm constatescha numerusas empustaziuns en il Partenz. Ma el agiunta che quai pudess esser da durada limitada. Cura che la pandemia saja vargada ed ils cunfins puspè averts, na quinta el betg pli cun tantas rulottas en Svizra.

RTR actualitad 08:00

Artitgels legids il pli savens

Scrollar a sanestra Scrollar a dretga