Siglir tar il cuntegn

Header

cuntegn

Chantun Nua pon ins far fieu da Silvester?

La pauca naiv en grondas parts dal chantun ha procurà ch’il privel d’incendis è il mument en l’entir chantun considerabel. Surtut en il sid dal chantun è il privel d’incendis grond. A partir da mesemna a bun’ura ha il chantun ordinà in scumond absolut da far fieu per las valladas dal sid.

La charta da privel dal chantun duai dar ina survista dals privels d'incendis. Ella è equivalenta a las cartas da privels da lavinas ni era d'inundaziuns. La carta da privels mussava la damaun da la mesemna, ils 28 da december, per la gronda part dal chantun in privel d'incendis pitschen fin a considerabel. Pir suenter l'incendi actual en il Mesauc ha il chantun prendì mesiras e scumandà da far fieu en las valladas dal sid.

Las vischnancas decidan

Avrir la box Serrar la box

L’uffizi da guaud e privels da la natira dal Grischun recumondà da s’infurmar sin vischnanca pertutgant las reglas da fieus artifizials. Gia scumandà da far fieus artifizials han las vischnancas San Murezzan e Segl. En las vischnancas da Trin, Claustra e Tavau dastgan ins be duvrar fieus artifizials cun retegnientscha e be en ils quartiers.

Far attenziun cun fieus artifizials

En la Val Mesauc, la Bregaglia e la Val Puschlav èsi en general scumandà da far fieus el public, pia era fieus artifizials. In grond privel d’incendis da guaud regia en la Val Müstair, la Val dal Rain da Cuira, la Tumleastga e Mantogna. Quai di Andrea Kaltenbrunner da l'Uffizi da guaud e privels da la natira dal Grischun. «Considerabel» saja la situaziun en tut las autras regiuns dal Girschun. Da princip decidian dentant las vischnancas sezzas, tge reglas che valan pertutgant ils fieus artifizials, di Andrea Kaltenbrunner.

Guaud brischa en media 20 giadas ad onn en il Grischun

Sco l’Uffizi da guaud e privels da la natira scriva, dettia en media 20 incendis da guaud ad onn en il chantun. Tranter ils onns 1981 e 2008 ha quai dà en l’entir chantun 528 incendis da guaud. Cunzunt l’onn 2003 era in onn cun setgiras e cun temperaturas da record – ed era in onn d’incendis. En tut eran vegnids dumbrads 44 incendis da guaud, quai marcant sur la media annuala.

Quatter gronds incendis da guaud aifer dus onns

Tranter ils onns 1996 e 1998 ha quai dà quatter gronds incendis da guaud sin l'intschess dal chantun Grischun. Uschia a Bever l’avrigl 1996, a Brusio il mars 1997, Mesauc l'avrigl 1997 ed anc ina giada a Brusio l’avrigl 1998. Ils custs da stizzar quests incendis pli gronds han muntà mintgamai tranter in pèr tschientmilli francs e tschintg milliuns francs.

L’Uffizi da guaud e privels da la natira dal chantun ha elavurà mesiras, co incendis da guaud pon vegnir evitads. Tuttina dat quai adina puspè tals incendis.

RR actualitad 17:00

Artitgels legids il pli savens