1 fin 2% da 50'000 nursas: quai èn 500 fin 1'000 nursas mintg'onn. Quai che tuna dad in'auta cifra saja per in chantun muntagnard dentant normal, uschia Jan Boner, cussegliader per protecziun da scossas al Plantahof. Cun quai ch'il Grischun ha bleras costas stippas e crappa lucca, stoppian ins far quint cun numerusas nursas che crappan pervia d'in accident.
Betg resguardads en la stimaziun: ils stgarps d'animals da rapina. Qua datti tenor Jan Boner mintg'onn enturn 100 nursas stgarpadas.
Questa cifra è s'augmentada marcantamain ils davos dus onns.
En Surselva hajan ins plirs trieps novs da lufs sin in pitschen territori. Quai saja ina gronda sfida, uschia il cussegliader. Els hajan experientscha cun singuls lufs u cun il triep dal Calanda. Uss dettia dentant ina nova situaziun.
Cumpensaziuns per stgarps
Sche l'Uffizi chantunal da chatscha e pestga po confermar ch'in animal da rapina ha stgarpà in animal, survegn il possessur ina cumpensaziun. Quant bler dependa da la vegliadetgna da la nursa. Per regla èn quai tranter 250 fin 1'400 francs. Per definir la valur d'ina nursa nizzegia l'uffizi ina tabella da l'Uniun federala dals allevaturs da nursas.
Per nursas ch'èn mortas pervi da crudada da crappa u insatge sumegliant, na datti naginas indemnisaziuns da l'uffizi. Quests donns van a cust da l'alp u dal possessur da l'animal. Tenor Jan Boner datti assicuranzas per animals. Per las nursas n'haja dentant strusch in pur en il Grischun ina tala.
RR actualitad 08:00