Siglir tar il cuntegn

Chantun «Nus n’essan betg grits, ma trumpads»

Il trio da chatschadurs da la secziun Madrisa è vegnì bandischà da l’Uniun grischuna dals chatschadurs da patenta. Christian Mathis, Jakob Dönz ed Erhard Michel fetschian donn als interess da l’uniun cun l’inziativa encunter la chatscha speziala.

Il maletg mussa Erhard Michel e Jakob Dönz dal comité d'iniziativa encunter la chatscha speziala
Legenda: Erhard Michel e Jakob Dönz dal comité d'iniziativa encunter la chatscha speziala RTR/gj

Els cumbattan per midar l'artitgel 11 da la lescha da chatscha uschia, ch'ins po regular il diember da selvaschina en il Grischun senza la chatscha speziala il november e december. Uss è l'artitgel 11 dals statuts da l'uniun grischuna dals chatschadurs da patenta daventada lur destin.

En la brev ch'els han survegnì, che sclauda els per immediat d'uniun e secziun, sa referischa la suprastanza sin quest artitgel. Lur engaschi e lur s'exponer public encunter la chatscha speziala fetschia donn a l'uniun. Il trio bandischà è trumpà, l'uniun haja vulì statuir in exempel.

Il maletg mussa Jakob Dönz cun sia distincziun per merits spezials da l'Uniun grischuna da chatschadurs
Legenda: Jakob Dönz cun sia distincziun per merits spezials da l'Uniun grischuna da chatschadurs RTR/gj

Jakob Dönz ed Erhard Michel èn stads passa 40 onns en l'Uniun chantunala. Surtut la glista d'engaschi e merits da Dönz è lunga. Presidià 16 onns la secziun Madrisa, numerus onns delegà en l'Uniun svizra da catschadurs e schef da la tgira da selvaschina, inizià l'emprim percurs da chatscha en il Grischun, 10 onns manader dals chauns da sang ed anc bler auter. La solidaritad ch'els sentian da lur secziun Madrisa saja gronda.

Nus essan las unfrendas per far taschair vuschs criticas

Il trio deplorescha ch'i na saja mai vegnì tar in discurs cun la surpastanza, avant la decisiun e la brev ch'excluda els da l'uniun. Quai saja trist ed in agir schon quasi da desparà. Dentant, els acceptian. E spetgan sin la decisiun da la dretgira federala.

Suenter ch'il Cussegl grond ha gì refusà l'iniziativa e la dretgira chantunala ha declerà ella nunvalaivla, duai Losanna uss decider. La decisiun schebain l'iniziativa encunter la chatscha speziala vegn avant il pievel grischun u betg vegn spetgada il pli baud la primavaira 2017.

Il maletg mussa il chatschadur e deputà Christian Mathis
Legenda: Chatschadur e deputà Christian Mathis RTR/md
Jau stun mal per Dönz e Michel.
Autur: Christian MathisChatschadur e deputà dal Cussegl grond

RR actualitad 07:00