Il mars hajan ins vesì blers lufs en ed enturn territori abità en la regiun Valragn, scriva l’Uffizi da chatscha e pestga grischun en ses rapport mensil davart ils animals da rapina gronds. Ils animals da rapina hajan bain stgarpà blers animals selvadis – ma nagins animals da niz.
Per ch’ils lufs na s’avischinian betg pli uschè datiers als territoris abitads, hajan els narcotisà in animal e mess in emettur enturn il culiez. Quai scriva l’uffizi da chatscha. Cun las datas veglian ins survegnir dapli infurmaziuns davart il cumportament dals animals.
Passa 200 observaziuns
En tut ha l’Uffizi da chatscha survegnì il mars 210 annunzias davart lufs en il Grischun. Vitiers hai dà radund 50 observaziuns da lufs-tscherver. Ed actualmain fa l’uffizi in’acziun, per savair pli exact quants lufs-tscherver che sa chattan en las regiuns Surselva, Stussavgia e Muntogna. Cun resultats pon ins quintar il pli baud la stad.
