Siglir tar il cuntegn

Header

audio
Saira: Naginas retenientschas en la rait
Or da Actualitad dals 07.10.2019.
abspielen. Laufzeit 03:25 Minuten.
cuntegn

Odi en la rait «Ti h**** r*******!»

Pertge essan nus en la rait pli maltschecs ch'en il mintgadi? La raschun è simpla: Nus na survegnin nagina reacziun directa.

Per blers da nus tutgan las raits socialas u gasettas online vitiers. E là chattan ins adina er commentaris fitg maltschecs. I vegn sdiavlà sur da politichers e smaladì auters commentaturs – savens senza retegnientschas. Tut auter ch'en la realitad. La raschun è fitg simpla, uschia Andres Schneeberger, psichiater e directur da la partiziun da creschids dals servetschs psichiatrics dal Grischun: La reacziun directa manca.

Blers stattan mal pli tard

En discurs directs datti adina reacziuns, saja quai verbalas u nunverbalas. Auter è quai en la rait. Là na datti nagina reacziun directa dal visavi. Uschia èsi pussaivel ch’ins sesa a chasa sin canapé vi dal laptop e sa vilenta d’in politicher u dad uschiglio insatgi e scriva lura simplamain, tge ch’ins pensa en quel mument.

La part dal tscharvè ch’è responsabla per las emoziuns surpiglia la batgetta e gia èsi capità ed ins ha scrit insatge ch’ins n’ha betg manegià uschia. Tenor Andres Schneeberger stattan lura er blers che vegnan confruntads cun lur commentaris pli tard mal da quai ch’els han scrit. La medema reacziun pon ins tenor il psichiater er observar en l’auto. Er là sa sentan ins segir ed ins po sdiavlar senza ch’i dat ina reacziun.

Societad n’è betg vegnida pli brutala

Ch’ils commentaris en raits socialas u tar gasettas online mussian che nossa societad saja vegnida pli criva u pli brutala, na crai Andres Schneeberger dentant betg. Anzi, nossa societad saja vegnida pli paschaivla e pli civilisada. Dentant tuttina haja mintgin da nus emoziuns negativas e probabel haja er mintgin gia gì fantasias da violenza. E cura ch'ins sa sentia segir, sco per exempel a chasa vi dal computer, senza visavi direct, possia quai capitar ch'ins scrivia insatge ch'ins stettia suenter mal.

RR actualitad 17:00