Onn da record e puspè dapli dividenda tar la «EMS»

Acziunarias ed acziunaris han survegnì bunas novas da la mainagestiun Magdalena Martullo-Blocher: Cifras positivas e dapli dividenda.

Radund 2300 persunas han visità la radunanza generala dalla EMS Chemie Holding SA a Domat. La mainagestiun Magdalena Martullo-Blocher ha preschentà il resultat da record per il 2016: La EMS Chemie ha pudì augmentar la svieuta netta per 4,1% sin 1,98 milliardas francs.

Era il gudogn da l’ interpresa è creschì; quai per 19% sin radund 456 milliuns francs. Quai sentan er ils acziunaris. Els pon sa legrar da 17 francs dividenda per aczia. Ils onns avant è quai stà damain cun 15 francs (per l'onn 2015) e 12 francs (per l'onn 2014).

Innovaziun e responsabladad per sasez

Dad onn tar onn po la EMS Chemie preschentar megliers resultads. Saja quai il ferm franc svizzer, il Brexit u era autras turbulenzas, ma grond donn na para tut quai betg a far a l'interpresa. Il recept per il success è tenor il president dal cussegl d'administraziun, Ulf Berg, oravant tut l'innovaziun.

«  Sche nus na purtain betg adina novas chaussas sin il martgà, na pudain nus betg suandar al mund che sa mida cuntinuadamain. »

Ulf Berg
President dal cussegl d' administraziun

L' innovaziun portia autas marschas. In auter motiv per il success è tenor Berg il concept da manar: «Nus schain als collavuraturs: Ti ès responsabel e sas 90%. Il schef sa mo 10%.» Ils lavurers hajan dapli responsabladad ed uschia er la schanza da midar dapli. Uschia saja l'interpresa pli sperta e la finala era innovativa.

RR actualitad 07:00