Siglir tar il cuntegn
cuntegn

Chantun Onuraziun per la lavur voluntara

Cun il Prix benevol Grischun èn questa sonda vegnids undrads quatter projects extraordinaris che sa basan sin lavur voluntara.

Las persunas che han prendì encunter il premi cun cusseglier guvernativ Jäger.
Legenda: Il premi benevol onurescha la lavur voluntara en il Grischun. MAD

En la categoria sport è vegnida undrada la gruppa da cursas d’orientaziun Cuira (OLG). I sa tracta qua d'ina da las pli grondas uniuns da cursas d'orientaziun da la Svizra. La OLG Cuira organisescha e maina tras davent da cursas per in e scadin fin tar campiunadis svizzers.

En la categoria unitad e convivenza ha survegnì l’Associazione Animazione Terza età da la Val Puschlav il premi. L'Uniun è vegnida fundada il 1993 ed ha 120 voluntaris che s'occupan dal bainstar da la populaziun attempada.

La Fondazione Cultura e territorio Cama è vegnida onurada en la categoria cultura. La finamira da l'uniun èsi da mantegnair e far reviver ils grottos en da Cama en la Val Mesauc.

Ed en la categoria sanadad ha survegnì il project roundabout da la crusch blaua grischuna il premi. roundabout è ina rait da Streetdance per mattas tranter 8 e 20 onns. Las 12 gruppas en differentas regiuns dal Grischun han tuttas manadras voluntaras.

Il Prix benevol Grischun è vegnì surdà per la quarta giada. Onuradas vegnan mintgamai organisaziuns ed uniuns che s’engaschan a moda voluntaria per il bainstar da la populaziun.

RR novitads 18:00