Orchester da l'Ucraina: Tranter Mozart e guerra

Trais concerts suna l'orchester da giuventetgna da l'Ucraina en il Grischun. Ils patratgs èn dentant adina er in zic en la patria e tar la guerra.

Laschar ir video «Tranter Mozart e guerra»

Tranter Mozart e guerra

1:40 min, Actualitad video dals 28.12.2016

L'orchester da giuventetgna da l'Ucraina suna trais concerts en il Grischun. Clarinettas, violinas, cellos… tut quai che tutga vitiers fa part da l'orchester che vegn ord in pajais da guerra.

La situaziun en l'Ucraina è strusch sa midada ils ultims trais onns. Cunzunt en l'ost dal pajais datti anc adina ferms cumbats. Ils musicists da l'orchester abiteschan en il vest dal pajais a Lwiw (Lemberg), ma er là en ils cumbats preschents. Fugitivs da l'ost arrivan en il vest. Els hajan stuì laschar enavos tut per salvar lur vita, uschia Anna Bura, ina da las violinistas.

Igl è sco sche la chasa brischass

Tenor Anna Bura èsi en l'Ucraina sco da viver en ina chasa che brischa. Il fieu è betg en la stanza nua ch'ins viva, ma ins senta el ed ins sa ch'el po vegnir fin en la stanza nua ch'ins viva. E quai fa tema, uschia la giuvna violinista. I saja impurtant dad adina puspe regurdar l'Europa che la guerra na regia betg mo en la Siria, mabain bler pli datiers – en l'Ucraina.