Siglir tar il cuntegn

Header

cuntegn

Chantun Ospital chantunal: Nova clinica d'uffants duai vegnir il 2019

Il matg 2017 vul l'Ospital chantunal dal Grischun cumenzar a construir la nova clinica d'uffants cun in tract da letgs. Dus onns pli tard, il matg 2019 duai la nova clinica ir en funcziun.

Il bajetg per la nova clinica d’uffants vegn a custar 45 milliuns francs, las investiziuns en ils bajetgs existents 20 milliuns francs. «Il basegn d'engrondir la clinica d'uffants exista gia dapi onns», di Martin Schmid president da la fundaziun dal ospital.

Ils plans per la clinica d'uffants a Cuira.
Legenda: Ils plans per la clinica d'uffants èn sin maisa. MAD

Era il ressort da sanadad è sin buna via

Tar la Villa Fontana, il bajetg cotschen tar l'ospital da dunnas Fontana duai dar in ressort da sanadad. Quel duai cuntegnair in center da sanadad, in hotel da sanadad ed abitaziuns per seniors. Suenter il gea dal suveran da Cuira al midament da la zona il zercladur po l'ospital chantunal ussa planisar il project.

L'urari prevesa d'avair sin maisa la fin dal 2017 il plan d'areal, da manar tras il 2018 la concurrenza d'architectura e da cumenzar cun la construcziun dal 2022 ni 2023. Finanziar vul l'ospital chantunal il project da 100-150 milliuns francs sez, sco Arnold Bachmann, il mainagestiun ha declerà envers las medias.

Ospital chantunal 2015:

Avrir la box Serrar la box

Pazients staziunars: 16’882

Pazients ambulants: 64’957

Emploiads: 2’057

Naschientschas: 1’037

Letgs: 350

Occupaziun dals letgs: 92%

Atterradas da heli: 724

audio
Saira: Ospital chantunal - Plirs projects per milliuns
ord Actualitad dals 08.08.2016.
laschar ir. Durada: 3 minutas 12 Secundas.

Per finanziar tut dovra l’ospital gudogns

L’ospital chantunal stat finanzialmain sin chommas saunas. Il 2015 hajan ins nudà ina svieuta da 321 milliuns francs (2014: 318 milliuns francs), quai tar expensas da 286 milliuns francs (2014: 278 milliuns francs).

Suenter las amortisaziuns necessarias resta in gudogn da 31 milliuns francs (2014: 36 milliuns francs). Tenor il directur Arnold Bachmann cumprovan las cifras la stabilitad finanziala da l'ospital. Uschia saja quai er pussaivel da finanziar la nova clinica d'uffants ed il ressort da sanadad or da l'atgna chascha.

RR novitads 11:00

Artitgels legids il pli savens