Siglir tar il cuntegn

Chantun Ospital chantunal sto pajar la mesadad dals 11 milliuns

Las cassas da malsauns gudognan la dispita da tariffa, ils ospitals e las clinicas grischunas ston pajar enavos 11 milliuns francs. Da quels 11 milliuns francs sto sulet l'ospital chantunal pajar enavos la mesadad a las cassas da malsauns.

ospital chantunal
Legenda: L'ospital chantunal a Cuira sto pajar radund la mesadad dals 11 milliuns francs a las cassas da malsauns. RTR, R. Müller

La dispita da tariffas tranter ils ospitals grischuns e las cassas da malsauns è schliada. Radund 11 milliuns francs ston ils ospitals e las clinicas pajar enavos a las cassas da malsauns. Quai ha decis il tribunal administrativ federal e quai definitivamain.

Radund la mesadad dals 11 milliuns stoppia l'ospital chantunal pajar, l'autra mesadad pertutgia ils ulteriurs ospitals grischuns. Quai ha il schef da l'uffizi da sanadad dal Grischun, Rudolf Leuthold confermà envers RTR. Bain ina gronda summa, però betg ina che pericliteschia ils ospitals.

Proximamain vulan la federaziun grischuna dals ospitals e la cuminanza da cumpra da las cassas da malsauns TarifSuisse seser vi d’ina maisa e discutar co reglar ils pajaments.

Dispita pervi da tariffas dals tractaments ambulants

La raschun per la dispita eran las tariffas dals tractaments ambulants en ils ospitals e las clinicas grischunas. Sco quai ch'igl è da leger en la sentenzia, ha la dretgira cunquai abolì la valur dad 85 raps che la regenza grischuna aveva fixà. Cun 82 raps correspunda quella ussa a quella dals medis che practicheschan libramain. La sentenzia è definitiva e na po uschia betg pli vegnir contestada.

RR novitads 12:00/17:00