Siglir tar il cuntegn

Header

cuntegn

Ospital da Tavau Er il quint dal 2018 serra cun in deficit

Sco spetgà na cuntenta er il resultat annual dal 2018 da l'ospital betg. Quai saja la consequenza logica da las structuras dals onns avant.

Il quint annual da l'ospital da Tavau serra er il 2018 cun in resultat dischillusiunant. L'ospital ha bain pudì augmentar las entradas per 1,4 milliuns francs e nudà bunamain 10% dapli pazients staziunars – cumpareglià cun l'onn avant. Tuttina munta il deficit dal resultat da gestiun da l'ospital ad 1,6 milliuns francs avant amortisaziuns e 4,8 milliuns francs suenter amortisaziuns. Cumpareglià cun l'onn avant è quai in meglierament per 1 milliun respectiv per 800'000 francs.

Novas mesiras n'han anc betg gì grond effect

Sco l'ospital scriva en ina communicaziun, sa basia il resultat negativ sin las structuras e sin ils process dals onns passads e saja uschia ina cuntinuaziun logica. Il cussegl d'administraziun nov è bain cuntent cun la nova strategia ed ils process da svilup, dentant betg cun il temp per metter en pratica. Las mesiras instradadas avant in onn, n'hajan uschia gì anc memia pauc effect sin il resultat da gestiun.

Per megliurar la situaziun finanziala aveva il parlament da Tavau approvà avant in onn ina contribuziun a fond pers da 2 milliuns francs per l'ospital. En il medem mument era er l'entir cussegl d'administraziun vegnì barattà ora.

RR novitads 06:00

Artitgels legids il pli savens