Sumegliant sco auters onns
L'Ospital chantunal a Cuira ha gì pli u main tuttina blers cas urgents sco auters onns, hai gì num sin dumonda da RTR.
Nus pudain dir ch'igl è stà pli u main sco ils auters onns. Mintga di dependi dentant, co l'aura ed er co la situaziun da naiv è.
Medemamain sco auters onns ha il dumber d'accidents dependì da l'aura e da la naiv. Er l'ospital regiunal a Glion e l'ospital a Scuol han ditg sin dumonda ch'ils dis da festa sajan stads da cumparegliar cun auters onns puncto accidents ed auters cas urgents.
Pli ruassaivel
Ruassaivel saja percunter stà en l'ospital a Samedan ed en il center da sanadad a Savognin. Ils responsabels decleran, ch'els hajan gì ils dis da festa passads marcantamain damain cas urgents en cumparegliaziun cun ils dis da festa d'auters onns.
Da principi èsi stà fitg ruassaivel, bler pli ruassaivel ch'auters onns. Nus avain gì marcantamain pli paucs accidents ed er puncto corona èn las cifras restadas bassas.
Cas da corona
Puncto la situaziun da corona èsi d'udir da tuts il medem tenor: Il dumber da pazientas e pazients na saja betg s'augmentà durant ils dis da festa ed i saja vegnì testà sumegliant blera glieud sco avant ils dis da festa.