Siglir tar il cuntegn

Header

Navigaziun

cuntegn

Ovra da Giovanni Giacometti Sut il martè – panorama da Muottas Muragl

Sin 2,8 fin 4 milliuns francs schazegia la chasa d’aucziun Koller a Turitg la pictura da Giovanni Giacometti. L’ingiant cumenza il venderdi da las 14.00.

In’aucziun sa splega in pau sco quai ch’ins vesia magari en films, di aucziunari Cyril Koller. Sper il panorama da Muottas Muragl èn anc radund 150 autras ovras dad artists svizzers en aucziun. La pli spectaculara è dentant il panorama che mesira passa tschintg meters.

Per sa participar a l’aucziun stoppian ins betg exnum vegnir en la sala d’aucziun. Ins possia era ingiantar online u per telefon. Però: Ir spontan a l’aucziun ed ingiantar in’ovra uschè custaivla na saja betg pussaivel, pertge la chasa d’aucziun stoppia avair ina conferma da banca.

Pliras persunas sajan s’infurmadas durant las ultimas emnas e sajan vegnidas a guardar il panorama da Muottas Muragl, di laucziunari. Offertas concretas n’haja el anc survegnì naginas.

Quest panorama ha in scharm spezial e mussa in imposant mund alpin.
Autur: Cyril Kolleraucziunari

Per schezegiar il pretsch sajan ins s’orientà vi dal panorama da Flem ch’ins ha vendì avant trais onns per 4,05 milliuns francs.

En il Grischun han exponents politics e da la cultura exprimì in tschert malesser pervi da la vendita dal panorama. L’aucziunari di dentant ch’il panorama na saja betg pers per il Grischun.

Ils blers collecziunaders svizzers èn generus e mettan a disposiziun lur ovras a museums u per exposiziuns.
Autur: Cyril Kolleraucziunari

Sumegliant destin sco panorama da Flem?

L’aucziun sveglia regurdientschas a l’ingiant dal panorama da Flem. Lez è vegnì vendì avant trais onns per 4,05 milliuns francs. L’ingiant aveva era procurà la chasa d’aucziun Koller a Turitg.

Giovanni Giacometti aveva survegnì il 1904 l’incumbensa da picturar il panorama per il hotel Waldhaus a Flem. Suenter la renovaziun dal hotel han ins allontanà l’ovra. Il panorama è ì en emblidanza fin ch’in directur dal Waldhaus l’ha fatg amogna il 1968 al Museum d’art grischun. Lez n’ha dentant gì nagin interess.

A l’aucziun avant trais onns ha la Fundaziun Saner aquistà il panorama. La fundaziun posseda in museum damanaivel da Biel. Là pon gruppas s’annunziar ed ir a contemplar il panorama da Flem. Gliez n’era avant betg pussaivel.

Era il panorama da Muottas Muragl n’han ins betg pudì ir a contemplar ils ultims onns. Ils possessurs l’han dà il 1952 sco emprest al Museum d’art dal Grischun. Dapi lura han ins exponì il panorama quatter giadas: il 1961 a Cuira, il 1982 a San Murezzan, il 1983 a Cuira ed il 1997 a Losanna.

L'istorgia dal maletg

Planisà era il panorama per l’exposiziun mundiala dal 1900 a Paris. En sasez aveva Giovanni Segantini – e betg Giovanni Giacometti - survegnì l’incumbensa. El aveva planisà da far in panorama gigantic. L’istoricher d’art Paul Müller descriva en il catalog d’aucziun manidlamain l’istorgia dal panorama da Muottas Muragl.

Segantini planisava da far la pictura en collavuraziun cun Giovanni Giacometti, Cuno Amiet e Ferdinand Hodler - ord la vista dad oz ils stars da la pictura da lez temp. Trais onns avant l’exposiziun mundiala èn Giovanni Segantini e Giovanni Giacometti sa rendì si Muottas Muragl sin 2453 meters sur mar ed han fatg skizzas e fotografias.

Planisà n’era betg mo in panorama picturà, mabain era da bajegiar pitschnas punts e cascadas e da procurar cun ina maschina per in vent frestgin. Ils visitaders da l’exposiziun duevan sa sentir sco si Muottas Muragl. Ils plans èn dentant stads in pau a l’engronda ed ord motivs finanzials han ins stuì desister da quest panorama gigantic.

RR actualitad 12:00