L'annullaziun da la situaziun extraordinaria è er in zic ina midada da simbol. Per la populaziun sa midia numnadamain nagut, di Rudolf Leuthold, manader dal uffizi da sanadad dal Grischun. Tegnair distanza e tuttas mesiras d'igiena valian vinavant.
Midada administrativa
La midada d'extraordinari sin normal vegn ad esser da sentir pli fitg davos las culissas. Uschia dat il stab directiv chantunal puspè giu cumpetenzas als uffizis responsabels dal chantun Grischun. Per dumondas da sanadad è per exempel l'uffizi da sanadad puspè responsabels e betg il stab directiv chantunal.
Auters chantuns, sco il chantun Turitg per exempel, midan percunter en la situaziun speziala. Oravant tut chantuns cun in'auta populaziun turnan en in emprim pass tar la situaziun speziala enstagl normala.