Parc Adula e Confederaziun chattan dialog constructiv

L’ultim temp aveva quai dà pliras malchapientschas tranter la Confederaziun e l’Uniun Parc Adula. Uss han las duas partidas para chatta in’enclegientscha communabla. Tenor la cussegliera federala Leuthard èn be pli intgins detagls da sclerir.

Parc Adula. Bild in Lightbox öffnen.

Legenda da maletgs: Parc Adula è sin buna via. Keystone

Il Parc Adula saja sin buna via, quai ha ditg la cussegliera federala Dors Leuthard a l'ur d'in inscunter culs responsabels dal Parc Adula e la regenza grischuna e tessinaisa.

I dettia mo singuls detagls da sclerir, uschia la cussegliera federala. Tenor Leuthard haja dà malchapientschas da pliras varts l'ultim temp. Per la zona circumdanta dal Parc Adula na dettia naginas novas restricziuns. I valia l'ordinaziun da parcs federala.

Chapientscha per la situaziun da l’Uniun Parc Adula

L’Uniun Parc Adula discurra en ina communicaziun d’in clima e dialog constructiv cun la Confederaziun. La cussegliera federala Doris Leuthard haja prendì enconuschientscha dals quitads da l’uniun ed ensemen hajan ins chattà in'enclegientscha.

Trais puncts che la Confederaziun ha suttastritgà tenor il scriver da l'uniun:

  • La Confederaziun na vul naginas novas restricziuns giuridicas per la zona circumdanta
  • Il Piz Adula/Rheinwaldhorn resta cumplainamain en la zona centrala dal futur parc naziunal, quai en cunvegnientscha cun il Departament federal da la defensiun VBS e cun la vischnanca Valragn
  • La Confederaziun sustegna era vinavant la realisaziun dal Parc Adula cun resguardar il princip «bottom-up» da sutensi, sco l’Uniun Parc Adula che represchenta las 17 vischnancas involvidas e las tschintg regiuns ha instradà il project.

RR novitads 18:00 / 14:00