Il dossier Charta Parc Adula vegn l’emprim discutà en las suprastanzas communalas pertutgadas. Ils 9 da november vegn il dossier che cumpiglia in contract da var 400 paginas publitgà uffizialmain. Dals 11 fin ils 20 da november datti infurmaziuns publicas en set lieus, numnadamain a Val S. Pieder, a Vrin, a Mustér, a Spleia, ad Olivone, a Mesocco ed a Rossa.
Vischnancas decidan 2016
Las 17 vischnancas pertutgadas en il Grischun ed en il Tessin vegnan a decider l’auter onn, sche ellas vulan far part al parc. In minimum da vischnancas che ston dir gea n’è betg vegnì definì.
In gea al Parc Adula maina ad ina cunvegna cun ina durada da diesch onns (2018-2028). Il parc vegn a porscher 18 plazzas da lavur cumplainas. Enfin oz ha il project Parc Adula gia inizià e sustegnì dapli che 80 projects. Tranter ils onns 2016-2019 prevesa il Parc Adula investiziuns da 15.4 milliuns francs.
