Siglir tar il cuntegn

Header

cuntegn

Chantun Parc Adula - Zona circumdanta

Per la zona enturn il parc valan er tschertas restricziuns. Auter che en la zona da coc, nua ch'ins na dastga betg ir a chatscha u a pesca e nua ch'ins na dastga er betg bandunar las sendas, valan per la zona circumdanta singuls puncts ch'èn formulads fitg avert.

Las vischnancas enturn il parc Adula èn obligadas da:

  • mantegnair e promover il spazi da viver d'animals e plantas
  • respectar il maletg dal vitg e da la cuntrada
  • procurar per in turissem ecologic
  • mantegnair la funcziun ecologica da terren agricul, da guauds e d'auals e flums
  • mantegnair il maletg dal vitg e da la cuntrada er tar novs bajetgs
  • sminuir distubis existents dal maletg dal vitg e da la cuntrada nua che quai è pussaivel

audio
Mezdi: Parc Adula - Tge vala per la zona circumdanta?
ord Actualitad dals 07.10.2016.
laschar ir. Durada: 2 minutas 4 Secundas.

Prendì il cas ch'il pievel da las 17 vischnancas sin territori dal Parc Adula di gea al parc naziunal fan las vischnancas in contract cun la Confederaziun. Ellas èn lura suttamessas a l'ordinaziun da parcs da muntada naziunala. In artitgel, che cumpiglia en tut sis puncts, definescha la zona circumdanta.

Artitgel formulà fitg avert

Il professer per dretg public Peter Hänni da l'universitad da Fribourg di che l'artitgel saja formulà fitg avert. El defineschia las directivas minimalas tenor las qualas las vischnancas en zona circumdanta stoppian sa drizzar. Sch'in abitant vul dentant renovar sia chasa u bajegiar vitiers insatge, lura na sa midia da prinzipi betg bler.

Lescha da bajegiar communala vala anc adina

En emprima lingia valian numnadamain anc adina las leschas da bajegiar communalas, declera il professur per dretg public. Pir en cas che la vischnanca lubiss in project che na fiss betg conform a l'ordinaziun per la zona circumdanta, intervegniss la Confederaziun. La gronda part dal parc Adula è en zona circumdanta.

RR actualitad 12:00

Artitgels legids il pli savens